சில நேரங்களில் 

கண்ணீருக்கும் 

முத்தத்திற்கும் 

வேறுபாடில்லை🖤

இருளைத் தின்று

விழுங்குகிறேன்

தீரவுமில்லை

விடியவுமில்லை.

பெருமழைக் காலத்தில்தான்

எவ்வளவு 

நீர்ப்பெருக்கு

மனசு மீறி வழியாது 

உள்ளுக்குள் அடங்கி விடும்

கண்ணீர் போல

ஒரு மென்னிறகு இத்தனை கனம் கொண்டதா?

மயிற்தோகையின் சிறுமயிர் கீறி

குருதி வழிந்ததுண்டா?

மொழியற்ற பொதுப்பார்வையின் வீரியம் நெஞ்சு துளைத்ததுண்டா

பொருள் பொதிந்த சிறப்பு நோக்கில்

இதயம் சுக்கு நூறாய்ச் சிதையுமா?

பார்வை வீசிய வார்த்தைகள் உயிர் பிளக்குமா?

போய் வா எனக் கையசைத்து விடைதருதலினால்

காலடியில் நிலம் நழுவுமா?

எல்லாம் நேர்ந்த பின்

உலவும் ஒரு உருவு தன்னைப்

பிண்டமென்று கொளல் மட்டும் தானே தீர்வு

ஒவ்வொரு முறையும் 

உன் கையளிக்காமலே

அந்தச் சொற்களை

திரும்பக் 

கொண்டு வந்துவிடுகிறேன்

எனக்கு முன்னே செல்லும்நிழலைத் தொடர்கிறேன்விரும்பியோ அன்றியோ.வேண்டாம் என்று விடுத்துஇடப்பக்கம் நடக்கிறேன்நிழல் நடக்கிறதுஎன்னோடு இணைந்து.வெறுத்துத் திரும்புகிறேன் வேறோர் பாதைஇப்போதுநிழலென்னைத் தொடர்கிறது.நிழல் விழாப் பாதையொன்றைத் தேடிய என் பயணத்தில்நிழலற்ற நான் ஆகஇருளுக்குள் தொலைந்து போனேன்

நனைந்து தீர்க்காத மிச்ச மழையின் வாசமோ

பேசித் தீர்க்காத நட்பின் சாரலோ

நிறைவேறாத காதல் நினைவுகளோ

வயோதிகத் தாய்க்கு

நிறைவேற்றவேண்டிய பொறுப்புகளோ

இன்று வரை தீர்க்கப்படாத கடனோ

வளர்ந்து நிற்கும் பிள்ளைக்கு

செய்து முடிக்காத கடமையோ

ஏதோ ஒன்றைப் பற்றிக்கொண்டு

எழுந்து விட்டது

நோக்காட்டில் விழுந்து தவித்த உயிர்

வாழ்ந்தே ஆகத்தான் வேண்டும் போல

23.07.2023

கடுங்காபியில்

மிகச் சரியான அளவில் பால் சேர்த்து சுவை கூட்டுது

உன்னுடனான உரையாடல்

பிடிமண் எடுத்துச் செல்லக் கூட 

வக்கில்லாத இறுதி யாத்திரைதான்

ஒவ்வொருவர்க்கும்.

.

உணவுச் சங்கிலியில் கோர்த்தது தானே

உயிர்கள் எல்லாமே.

பிணந்தின்னும் அகோரிகளைப் போற்றிவாழும் மதந்தானே உமது.

.

உணவுக்கும் உயிருக்கும் 

விலங்கிற்கும் மனிதர்க்கும்

வாழ்வுக்கும் வீம்புக்கும்

வேறுபாடறியா உங்களின் 

மதங்கொண்ட மதவெறி மாயாதோ?

.

மதநீர் ஒழுகும் யானைகூட

மனதடங்கும் சில மணித்துளியில்.

.

மதவெறி கொண்ட உங்களின்

கோரப்பசி தீர இன்னும்

எத்தனை உயிர்கள் வேண்டும்?

.

அவன் போலொரு பிள்ளை 

உங்கள் வீட்டிலும் இருக்கலாம்.

அவன் உங்கள் பிள்ளையின் 

பள்ளித் தோழனாகவும் இருக்கலாம்.

.

அடித்துக் கொன்ற 

இரத்தக்கறை படிந்த

அந்தக் கரங்களோடு உம்மகனை அணைப்பீரோ?

.

அடித்த வெறி தீர

ஆசுவாசம் கொள்ள

அப்பிஞ்சின் குருதி குடித்து

உம் மதத்தாகம் தணிப்பீரோ?

பெண்...

குறில் தான்.

நெடில்களின் 

நீண்ட நெடிய கனவுகளுக்கும்

ஆசைகளுக்கும்

அற்ப கவுரவத்திற்கும்

குனிந்து நிமிர்ந்து

'ங' போல் வளைந்து.

மரணித்தவனின் தொடர்பு எண்ணை நீக்குகிறேன்

என் வாழ்நாளில்  

சில நொடிகள் குறைகிறது 😔

படம்: இணையத்தில் எடுத்தது

சாத்தானுக்கானதை

அவனிடமே சேர்ப்பித்ததில்

கடவுளுக்கென்ன ஆற்றாமை?

நிறைந்து வழியும் எனதன்பில்

சிறிதே அள்ளிக்கொடுப்பதி்ல்

தடையேதுமில்லை

முகம் திருப்பிப்போகும் 

உன் கோபத்தைத் தவிர 🖤

கேளாச் செவிகளோடு 

போராடித் தோற்ற வேளை

மௌனத்தின் தேவை புரிந்தது

மெல்லப் பொழுதுகள் சுமையாகும்

மூக்கின் நுனியில் செம்பொறியொன்று வலிதந்து சுடர்விடும்

அங்கங்களெங்கும் நோக

அடிவயிற்றில் தசையொன்று இழுத்துச் சுருட்டும்

தொடையிரண்டும் துவண்டு விழ

பாதங்கள் அடிவைக்க மறுக்கும்

உடுத்திய ஆடை மார்புக்காம்பின் நுனி தொட

நோகுதென்றே துடித்துப்போகும்

அன்பின் தீண்டலைக்கூட ஏற்காது அரற்றும்

முன்னேழு நாட்களில்

இப்போதா

இனிதானா

சதா

எச்சரிக்கையில் எப்போதும் உழலும் மனம்

முதல்சொட்டு மாதவிடாயின்போது

மரித்துப் போகும் பெண்ணுடல்

மூன்றாம் 

நான்காம்

ஐந்தாம் நாளில் உயிர்த்தெழுகிறது

அகவை நாற்பது கடந்த பின்னாலே.

படம்: இணையத்தில்

வலி : பெண்ணிடத்தில்

இன்னமும் முடிவுறாத

இந்த நாளின் இறுதிக்குள்

சந்தித்து விடவேண்டும் உன்னை

முடிவுறாதென

நான் மட்டும் பயணித்துக் கொண்டிருந்த அந்தச் சாலை முடிந்து விட்டது 

உனக்கான கண்ணீரும்

உன்னைப் பற்றிய கவலையும்

கொஞ்சம் மிச்சமிருந்தது

எதிர்பாராமல் வீசிச் சுழன்றடித்த காற்று

ஒரு தலைமுறை காலத்தைப் பின்கடந்து

எனை வீசிச் சென்று விட்டது. புதைந்து போன நினைவுகளுக்குள் இருந்து மீள்வழி ஏதுமில்லை. காற்றின் போக்கில் காலத்தின் செய்தியை கேட்டுக்கொண்டிருக்கிறேன்

ஒரு செய்தி

ஏதோ ஒன்றைக் குறைத்து விட்டிருக்கிறது எந்தன் உயிருக்குள்

ஏதோ ஒன்றைத் திணித்து விட்டிருக்கிறது இந்த இதயத்தில்

ஏதுமற்றதாய் விலகியிருந்த உணர்வொன்று

எல்லாமுமாய் ஆக்கிரமிக்கிறதென்னை

கண்ணீர் மொத்தமும் வறண்டு போன பிறகு வந்து சேர்ந்த துக்க செய்திக்கு 

எப்படி அழ?

நீ இல்லை

இனி எப்போதும் இல்லை

உன்னிடம் சொல்லாத

உனக்கான இந்த வார்த்தைகளை வைத்துக்கொண்டு 

என்ன செய்ய?

ஒரு காதல் செத்துப் போவது எப்போது?

பலமுறை வாய்ப்பிருந்தும் சொல்லிவிடாத காதலைச் 

சுமந்து பயணித்து வரும் உயிரின் வலி

எத்தனை காலம் தொடரும்?

கால இடைவெளிகளில் சந்தித்துக் கொண்ட போது

கனக்கும் நெஞ்சோடு புன்னகை பரிமாறி

கடந்து விட்ட சோகம் எப்போது தீரும்?

இணையவே முடியாது என்றாகிப்போனபின்னும்

எந்த நம்பிக்கையில் நெஞ்சில் உறைந்துகிடக்கிறது இன்னும்?

காதலாகிப் போனவன் காலத்தில் கரைந்த பின்னும்

ஏன் இன்னும் உயிர்த்துக்கிடக்கிறது

முளைவிட்டபோதே மரித்துப்போன இந்தக்காதல்?

இறந்த பின்பு

அலைக்கழிப்பு ஏதுமின்றி துயிலிடம் பெறுகிறார்

இடுகாட்டுக்கு அருகில் குடியிருப்பு வாய்த்தவர்

இந்த அறை நிரம்பியிருக்கிறது

நம் மூச்சுக்காற்றும்

முத்தச் சத்தமுமாய்🖤

பிப் 10,2019

எடையற்றுப் போகிறேன்

இறகெனவே 🖤

விடைபெறும் வேளை

ஒரு மலரென கையளித்துச் செல்கிறாய் உன் புன்சிரிப்பை ☺️

மழைத்துளி விழுந்தாலே

சட்டென்று வரும் தும்மலைப் போல 

உன் நினைவும் வந்துவிடுகிறது

ஆனால்

மழையோ

சளியோ

தும்மலோ 

ஒரு கட்டத்தில் நின்றுவிடுவதைப்போலல்ல

உன் நினைவு ❤️