Saturday, 15 March 2025

ஆழ்கடலின் பெருமூச்சு
சங்கொன்றினுள் சிறைப்படுதல்போல
என்னுள் நீ 🖤

Thursday, 16 January 2025

உனனைப் பார்க்கும்போதெல்லாம் 
கண்ணீர் கரை கட்டுகிறது
வெடித்தழுது தீர்த்து
எதையும் தூக்கி எறிந்துவிட்டுச் செல்பவள் தான்
உன்னைக் கண்டதும் விழி நிறைவை தடுக்க முடியாதவள் ஆகிறேன்
மேல் இமையின் இடுக்கில் வெம்மை நீர் சேரச் சேர
தாங்கவொண்ணா பாரம் கூடுகிறது
வலி நிறைகிறது விழியெங்கும்
மனதின் படபடப்பு கூடக்கூட
ஒரு கட்டத்தில் வலிதாங்காமல்
இமை வெடித்து விடுமோ என அஞ்சுகிறேன்
யாருமறியாமல் வழியும் நீரைத் துடைப்பதைவிட
அந்த வலி தாங்குதல் பேரிம்சை என்பதறிவாயோ
உன் சுடு சொல்லை விட
பரிவான அரவணைப்பு ஏன் இவ்வளவு வலி தருகிறது?

Sunday, 15 December 2024

சில நேரங்களில் 
கண்ணீருக்கும் 
முத்தத்திற்கும் 
வேறுபாடில்லை🖤

Monday, 9 December 2024

இருளைத் தின்று
விழுங்குகிறேன்
தீரவுமில்லை
விடியவுமில்லை.

Tuesday, 15 October 2024

பெருமழைக் காலத்தில்தான்
எவ்வளவு 
நீர்ப்பெருக்கு
மனசு மீறி வழியாது 
உள்ளுக்குள் அடங்கி விடும்
கண்ணீர் போல

Sunday, 15 September 2024

ஒரு மென்னிறகு இத்தனை கனம் கொண்டதா?
மயிற்தோகையின் சிறுமயிர் கீறி
குருதி வழிந்ததுண்டா?
மொழியற்ற பொதுப்பார்வையின் வீரியம் நெஞ்சு துளைத்ததுண்டா
பொருள் பொதிந்த சிறப்பு நோக்கில்
இதயம் சுக்கு நூறாய்ச் சிதையுமா?
பார்வை வீசிய வார்த்தைகள் உயிர் பிளக்குமா?
போய் வா எனக் கையசைத்து விடைதருதலினால்
காலடியில் நிலம் நழுவுமா?
எல்லாம் நேர்ந்த பின்
உலவும் ஒரு உருவு தன்னைப்
பிண்டமென்று கொளல் மட்டும் தானே தீர்வு

Saturday, 14 September 2024

ஒவ்வொரு முறையும் 
உன் கையளிக்காமலே
அந்தச் சொற்களை
திரும்பக் 
கொண்டு வந்துவிடுகிறேன்