ஒரு காதல் செத்துப் போவது எப்போது?

பலமுறை வாய்ப்பிருந்தும் சொல்லிவிடாத காதலைச் 

சுமந்து பயணித்து வரும் உயிரின் வலி

எத்தனை காலம் தொடரும்?

கால இடைவெளிகளில் சந்தித்துக் கொண்ட போது

கனக்கும் நெஞ்சோடு புன்னகை பரிமாறி

கடந்து விட்ட சோகம் எப்போது தீரும்?

இணையவே முடியாது என்றாகிப்போனபின்னும்

எந்த நம்பிக்கையில் நெஞ்சில் உறைந்துகிடக்கிறது இன்னும்?

காதலாகிப் போனவன் காலத்தில் கரைந்த பின்னும்

ஏன் இன்னும் உயிர்த்துக்கிடக்கிறது

முளைவிட்டபோதே மரித்துப்போன இந்தக்காதல்?