நந்தவனமொன்றில்

பூ பறித்தானோ

சாக்லேட் மலையொன்றில் ஏறிச்சென்றானோ

நண்பர்கள் சூழ விண்ணில் பறந்தானோ

நாளெல்லாம் சிறகு விரித்த களைப்பின்றி

விடிகாலை உறக்கத்தில் 

குலுங்கிக் குலுங்கிச் சிரிக்கும்

வெற்றிமாறனின் கனவுக்குள் 

விண்மீன்கள் ஒளிரட்டும்❤️

17.01.2020

காய்ச்சலுக்கு மருந்து தரும்

அம்மாவை 

ஏய்த்துவிடும் குழந்தைகள்

தத்தம் பொம்மைக்கு 

மருந்து தரத்

தவறுவதேயில்லை 

கண்டிப்புடன்.

விழிகளை உறக்கம் தழுவாமல்

இருள் மட்டுமே கவிந்திருக்கும் இப்பொழுதை

இரவென்று சொல்வதெப்படி?

கீச்சிட்டு 

அன்றைய பொழுதினை 

அளவளாவி 

அந்தியில் கூடடைகின்றன

அரசமரச் சிட்டுகள் 🕊️🕊️

பகலெல்லாம் குகுகி அழைத்த புறாக்களுக்காக

மழைக்கச்சேரி நடத்துது வானம் ❤️🧡💚🖤

மண்கிளர்த்தி துளிர்த்தது அந்தச்செடி

மொத்தம் மூணு இலைவிட்டு.

தளிரின் மென்மை தூண்டியதாய்

சற்றே தீண்டிப்பார்த்தது அரவமொன்று.

வளர்ந்து செழித்தது செடி

மொட்டுகள் தூண்டியதாய் 

முகர்ந்து தீண்டியது அரவமொன்று.

பூத்துக்குலுங்கி புன்னகை செய்தது.

வண்ணங்கள் தூண்டியதாய்

வலிந்து தீண்டியது அரவமொன்று.

காய்த்துக் கனிந்த தருவாய் 

நின்றது.

செழுமை தூண்டியதாய்

சிறிதே உரசித் தீண்டியது அரவமொன்று.

ஆணிவேரூன்றி

அடர்ந்து கிளைத்துப் படர்ந்து நின்றது விருட்சமாய்.

நிழலின் இதத்தில் 

வாகாய்த் தங்கி

வசதியாய்த் தீண்டியது அரவமொன்று.

அரவங்கள் தீண்டுந்தோறும்

அரவமெழுப்ப வழியற்று அமைதிகாத்த விருட்சத்தை

ஆதித்தரு என்றே போற்றி

ஆலயம் எழுப்பிட்டார்.

அங்கே 

அர்ச்சனை செய்யவும்

அரவமொன்று வந்தது.

24.08.2016

இருள்கீறி உள்நுழையும் ஒளியென

இதயம் கீறும் உன் நினைவுகள்.

வழுவழுத்த தரையில் திக்குமுக்காடும் அரவமென

அரவமின்றி அலைபாயும்.

கழுத்தைக் கட்டிக் கொஞ்சும் மழலையென

கணநேரம் கொண்டாடும்.

அழைக்கும் பொழுதில் பழிப்புக்காட்டி ஓடும் குழந்தையென போக்குக்காட்டும்.

அணைத்தே மடிசாய்க்கும் அன்னையென

அவதாரமெடுக்கும்.

வேண்டாமென்றே விலகி நின்றாலும்

அருகில் வந்து நின்று

அடாவடியாக ஆக்கிரமிக்கும்.

12/08/2021